ОНЦГОЙ БАЙДЛЫН АЛБА АЧААЛАЛ ИХТЭЙ БАЙНА

Жавзмаа

Ойрын үед онцгой байдлын алба хаагч нар ажил ихтэй байна. Хүмүүсийн амралт зугаалга, найр наадмын улирал тохиож байгаагийн сацуу ой хээр, объектийн түймэр, үер усны аюул тасрахгүй байна. Өчигдөр /2017.07.27/ онцгойгийнхон дуудлага олонтой, ачаалал ихтэй өнжжээ. Тухайлбал:

Усны осол /эрэн хайх, аврах/: Булган аймгийн Сайхан сумын Ундрах багийн “Нарийн хүрэмт” гэдэг газар /сумын төвөөс зүүн урд зүгт 24 км-т/ “Орхон” голд иргэн Б /42 настай, эрэгтэй/ осолдсон тухай дуудлагыг 07.25-ны өдрийн 15:05 цагт хүлээн авч тус аймгийн Онцгой байдлын газрын 4 алба хаагч, 1 автомашин, 1 завь, орон нутгийн 20 иргэн, нийт 24 хүн, 1 техник хэрэгсэлтэйгээр эрэн хайх ажиллагааг зохион байгуулж байна.

Сэлэнгэ аймгийн Сант сумын Ивэн багийн “Орхоны гүүр” гэдэг газар /сумын төвөөс зүүн урд зүгт 17 км-т/ Улаанбаатар хотын Баянгол дүүргийн харьяат иргэн Б /17 настай, эрэгтэй/ “Орхон” голд осолдсон тухай дуудлагыг 07.27-ны өдрийн 16:25 цагт хүлээн авч тус аймгийн Онцгой байдлын газрын 9 алба хаагч, ар гэрийн 4 иргэн, нийт 13 хүн, 4 техник хэрэгсэлтэйгээр ажиллаж өнөө өглөө /2017.07.28/-ний 05:50 цагт осолдсон газраас 3.5 метрийн гүнээс цогцсыг олж цагдаагийн байгууллагад шилжүүлэн өгсөн.

Увс аймгийн Хяргас сумын Булганхангай багийн “Довонгийн урд шугам” гэдэг газар /сумын төвөөс урд зүгт 70 км-т/ Орхон аймгийн Баян-Өндөр сумын харьяат иргэн Н /51 настай, эрэгтэй/ “Хяргас” нуурт осолдсон тухай дуудлагыг 07.27-ны өдрийн 09:50 цагт хүлээн авч тус аймгийн Онцгой байдлын газрын 5 алба хаагч, 2 техник хэрэгсэлтэйгээр ажиллаж 07.27-ны өдрийн 13:50 цагт нуурын эргээс 30 метрийн зайд 8 метрийн гүнээс цогцсыг гаргаж цагдаагийн байгууллагад шилжүүлэн өгсөн.

Нийслэлийн Налайх дүүргийн 3 дугаар хорооны 57 дугаар уклон ашиглагдахаа байсан нүүрсний бичил уурхайд 2 хүн нас барсан байдалтай байна, цогцсыг гаргаж өгнө үү гэсэн цагдаагийн байгууллагаас ирүүлсэн дуудлагыг 07.27-ны өдрийн 15:51 цагт хүлээн авч ОБЕГ-ын харъяа Уул уурхайн аврах ангийн 5 алба хаагч, 1 хэрэгсэлтэйгээр ажиллаж Төв аймгийн Баянжаргалан сумын харьяат иргэн Д /45 настай, эрэгтэй/, тус дүүргийн харьяат Л /44 настай, эрэгтэй/ нарын цогцсыг 2 метрийн гүнээс гаргаж цагдаагийн байгууллагад шилжүүлэн өгсөн гэж ОБЕГ-ын албанаас мэдээллээ.