НАЛАЙХ ДҮҮРГИЙН ГОЛ ЗАМУУДЫГ ДӨРВӨН ЭГНЭЭ БОЛГОН ШИНЭЧИЛЖЭЭ

Жавзмаа

Нийслэлийн Авто замын сангийн хөрөнгө оруулалтаар Налайх дүүргийн гол замууд болох Даваажав, Дамдин, Найрамдлын гудамжны 1,3 км авто замын өргөтгөл шинэчлэлтийн ажлыг хийж байна. Тус замын гүйцэтгэгчээр “Эко тогтол” ХХК шалгарсан бөгөөд 2.8 тэрбум төгрөгийн төсөвт өртгөөр 2017 оны 10 дугаар сарын 01-нд хүлээлгэн өгөхөөр гэрээ байгуулсан юм.

Өнөөдрийн байдлаар ажлын явц 99 хувьтай байгаа бөгөөд хэвтээ тэмдэглэгээний ажил хийгдэж байна. Хуучин 2 эгнээ байсан авто замыг 14 метр өргөнтэй 4 эгнээ болгон шинэчилж, 3м өргөнтөй явган хүний зам, гадаргууны ус зайлуулах байгууламж, гэрэлтүүлэг бүхийн иж бүрэн замын ажлыг хийж хугацаанаас нь өмнө дуусгажээ.

Эдгээр замууд нь 1970-аад онд ашиглалтад орсноос хойш өнөөг хүртэл шинэчлэлт хийгээгүй учраас бүхэлдээ эвдрэлд орж, хөдөлгөөний аюулгүй байдал алдагдаад байсан юм гэж Нийслэлийн Авто замын газраас мэдээллээ.