ХҮНД ЦҮНХ ҮҮРЭХ НЬ ХҮҮХДИЙН ЭРҮҮЛ МЭНДЭД МАШ МУУ НӨЛӨӨТЭЙ

Жавзмаа

Хүнд цүнх үүрэх нь хүүхдийн эрүүл мэндэд маш муу нөлөөтэй

- Сурагчдын ширээ, сандал, цүнхний эрүүл ахуйн стандарт болон зөвлөмж -

ЕБС-ын сургалтад хэрэглэгдэх ширээ, сандлын хэмжээг MNS 6582: 2016 стандартаар тогтоодог. Сурагчдын ширээ сандлын стандартыг тогтоохдоо биеийн өндрийг харгалздаг байна.

СУРАГЧДЫН ШИРЭЭ БА САНДЛЫГ НЭГ БОЛОН ХОЁР СУУДАЛТАЙ БАЙХААР ТООЦНО

Тогтмол хэмжээтэй ширээ сандал (ЕБС-ын 1-3 анги)
Тохируулгатай хэмжээтэй ширээ, сандал (ЕБС-ын 4-12 анги)

Стандартад нэг метр өндөртэй хүүхэд хэдэн см-ын өндөртэй сандал, ширээн дээр суух вэ гэдгийг тодорхой тусгасан байдаг. Стандартад сурагчдын ширээ, сандлыг зургаан ангиллаар үйлдвэрлэж, сургуулиуд сурагчдын өндрийг харгалзан улбар шар, хөх ягаан, шар, улаан, ногоон, цэнхэр гэсэн зургаан өнгийн таних тэмдгийг хэрэглэнэ гэж заасан.

Жишээ нь, 115-130 см өндөртэй хүүхэд хөх ягаан өнгийн тэмдэглэгээ бүхий 50 см өндөр ширээ, 30 см өндөр сандал дээр суух ёстой. Харин 160-175 см өндөртэй ахлах ангийн сурагчид ногоон өнгийн тэмдэглэгээ бүхий 70 см өндөр ширээ, 42 см өндөр сандал дээр суух юм.

СУРАГЧИЙН ШИРЭЭ, САНДЛЫН АНГИЛАЛ, ӨНГИЙН ТЭМДЭГЛЭГЭЭ

№	Ширээний ангилал	Сурагчийн биеийн дундаж өндөр (мм)	Өндрийн бүлэг	Ширээ, сандлын өндрийн харьцаа	Өнгийн тэмдэглэгээ код
1	I	1050	1050-1150	Ширээний өндөр -53 Сандлын өндөр -31	Улбар шар
2	II	1200	1150-1300	Ширээний өндөр -59 Сандлын өндөр -35	Хөх ягаан
3	III	1350	1301-1450	Ширээний өндөр -64 Сандлын өндөр -38	Шар
4	IV	1500	1450-1600	Ширээний өндөр -71 Сандлын өндөр- 43	Улаан
5	V	1650	1601-1750	Ширээний өндөр -76 Сандлын өндөр -46	Ногоон
6	VI	1800	1751<	Ширээний өндөр -82 Сандлын өндөр -51	Цэнхэр

ХҮҮХДИЙН ЦҮНХ БИЕИЙН ЖИНГИЙНХ НЬ 10 ХУВИАС ХЭТРЭХГҮЙ ЖИНТЭЙ БАЙНА

Манай улсад одоогоор цүнхний хувьд мөрдөх стандарт гэж байдагггүй. Дэлхийн эрүүл мэндийн байгууллагын зөвлөмжид тухайн хүүхдийн биеийн жингийн 10 хувиас хэтрэхгүй жинтэй байна гэсэн байдаг. Манайд бол 25 кг жинтэй хүүхэд байлаа гэхэд гурван кг, 25-35 кг жинтэй хүүхдэд 4.5 кг ч юм уу цүнх үүрүүлэх хэрэгтэй гэсэн норм бий.

Энэ нормын дагуу эцэг, эхчүүд хүүхдээ сургуульдаа явах үед цүнхийг нь байнга шалгаж, зайлшгүй хэрэгтэй сурах бичиг, хэрэгслийг нь л өгч явуулж хэвших хэрэгтэй байна.

Хүүхдээ сургуульд нь хүргэж өгч, авахдаа ч мөн адил аль болох өөрсдөө цүнхийг нь тээж явдаг байх нь чухал. Зарим хүүхэд тухайн өдрийн хичээлд хэрэглэгдэхгүй ном, дэвтэр, бал зэргийг цүнхэндээ хийж, зохих нормыг хэтрүүлдэг буруу жишиг байдаг аж.

Цүнхний жинг хэтрүүлсэнээр эрүүл мэндэд нь маш муу нөлөөтэй. Нэгдүгээрт хүнд цүнх авч явахад хүндрэлтэй. Хоёрдугаарт өсөлт, нурууны хөгжил, эрүүл мэндэд сөрөг нөлөөтэй байдаг. Тиймээс эцэг, эхчүүд хүүхэддээ цүнх авахдаа аль болох хөнгөнийг нь сонгох хэрэгтэй.

Эх сурвалж: Нийгмийн эрүүл мэндийн үндэсний төв