Оюутнууд СУРГАЛТЫН ТӨЛБӨР-ийн зээлд хэрхэн хамрагдах вэ?

А.Алтжин

Засгийн газрын хуралдаанаар “Сайн оюутан” хөтөлбөрийг баталж оюутнуудад сургалтын төлбөрийн зээл авах боломжийг олгоод байгаа билээ. БСШУЯ-аас "Сайн оюутан" хөтөлбөрийн зээлийн журмыг эцэслэн баталжээ. Энэ долоо хоногт БСШУЯ арилжааны гурван банк, магадлан итгэмжлэгдсэн дотоодын их, дээд сургууль, коллежиудтай гурвалсан гэрээ байгуулсанаар сургалтын төлбөрийн зээл олгож эхлэх юм байна.

Нэгдүгээрт, дахин санхүүжилтын зээл буюу сургалтын төлбөрт зориулан авсан цалин тэтгэврийн зээлийг шилжүүлэх.

Хоёрдугаарт, хичээлийн жил дотроо төлөх богино хугацааны зээл. ЭЕШ-нд 400-аас дээш оноо авсан байна.

Гуравдугаарт, урт хугацааны зээл буюу сургалтын төлбөрийн зээл аваад төгссөнийхөө дараах жилээс дөрвөн жилийн дотор төлөх. ЭЕШ-нд 650-аас дээш оноо авсан байх ёстой.

Зээлийн төрлөөс хамаарч тав хүртэлх хувийн хүүтэйгээр төгссөнөөс хойш 1-4 жилийн хугацаанд зээлээ төлөх юм. Сард дунджаар 200 мянган төгрөгийг орлогоосоо төлөх нөхцөлтэй. Сургалтын төлбөрийн зээл авсан тохиолдолд төгссөн эхний нэг жилд буюу ажилд орох хүртэлх завсрын хугацаанд зээл төлөхийг шаардахгүй аж. Ганцхан зээлийн хүүгээ төлөх юм.

Ингээд зээл авах оюутнууд дараах материалыг бүрдүүлж, дээр дурдсан арилжааны гурван банкны аль нэгд хандаж болно.

БҮРДҮҮЛЭХ МАТЕРИАЛ:

Зээл хүссэн өргөдөл;
Иргэний болон оюутны үнэмлэх эсвэл нотариатаар баталгаажуулсан хуулбар;
Сургуулийн төлбөрийн нэхэмжлэл (эх хувиар);
Гэр бүлийн гишүүний иргэний үнэмлэх эсвэл нотариатаар баталгаажуулсан хуулбар;
Гэр бүлийн гишүүн гэдгийг баталгаажуулсан баримт;
Бүрэн дунд боловсролын гэрчилгээ эсвэл нотариатаар баталгаажуулсан хуулбар;
Сургуульд зохих журмын дагуу элссэнийг гэрчлэх эрхийн бичиг эсвэл нотариатаар баталгаажуулсан хуулбар;
Гэр бүлийн гишүүний орлогын эх үүсвэрийг баталгаажуулсан баримт;

Харин тавигдах шаардлагын хувьд голч оноо, ЭЕШ-ын дүнг харгалзана. Гэхдээ зээл олгохдоо арилжааны банкууд өөр өөрийн шаардлага тавьжээ. Оюутны зээл олгож буй арилжааны гурван банкны мэдээллийг доорх линкээс харна уу.