Сантехникчдийн “Алтан газов” уралдаант тэмцээний ШИЛДГҮҮД тодорлоо

М.Жавзмаа

Энэ сарын 14-нд зохион байгуулагдсан ажил мэргэжлийн сонгон шалгаруулах Сантехникчдийн “Алтан газов” уралдаант тэмцээний шилдгүүд шагнал гардуулах хүндэтгэлийн тоглолт /2022.10.21/-нд МҮЭСТО-нд боллоо.

Жил бүрийн энэ үед “Алтан газов” сантехникийн засварчдын ажил мэргэжлийн сонгон шалгаруулах уралдааныг “Монголын сантехникчдийн хөгжлийн нийгэмлэг” орон сууц нийтийн аж ахуйн салбарын нийт засварчдын дунд зохион байгуулдаг билээ.

Ингэснээр орон сууц нийтийн аж ахуйн салбарыг хөгжүүлэхэд идэвх зүтгэл, үр бүтээл, ажлын онцгой амжилт гаргаж салбарын бүтээн байгуулалт, үйлчилгээний ажилтны нэр хүндийг өсгөх үйлсэд бодит хувь нэмэр оруулсан сантехникийн засварчдыг шалгаруулан, шагнаж алдаршуулах зорилготой юм.

Энэхүү уралдаанд “Орон сууц нийтийн аж ахуйн удирдах газар” ОНӨААТҮГ-ын салбар төвүүд болон “Хувийн орон сууц нийтийн аж ахуйн хөгжлийн төв” ТББ, “Орон сууц нийтийн аж ахуйн мэргэжлийн холбоо” ТББ-ын гишүүн компаниудаас шалгарсан шилдэг сантехникийн засварчид оролцсон бөгөөд ган хоолойгоор бэлдэц бэлдэх, PVC хоолойгоор угсралт хийх, мэдлэг сорих онол гэсэн төрлүүдээр өрсөлдөж, төрөл бүрээс шалгарсан засварчид алт, мөнгө, хүрэл медалиуд хүртэж, дээрх төрлүүдийн нийлбэр дүнгээр хамгийн өндөр оноо авсан гурван засварчин “Алтан газов-2022” цомын эзэн боллоо.