ХЗДХЯ " 2017 оныг иргэдэд ойр эрх зүйн үйлчилгээний жил" болгон зарлалаа

А.Алтжин

ХЗДХ-ийн сайд С.Бямбацогт өнөөдөр яаман дээрээ эрхлэх асуудлын хүрээний агентлаг байгууллагын дарга нартай 2017 онд хийж хэрэгжүүлэх ажил, үүрэгтэй холбоотойгоор үр дүнгийн гэрээ байгуулав.

Засгийн газрын үйл ажиллагааны хөтөлбөр, уг хөтөлбөрийг хэрэгжүүлэх нарийвчилсан төлөвлөгөөг хэрэгжүүлэхэд үр дүнгийн гэрээний биелэлт чиглэх юм. 2017 оныг ХЗДХ-ийн салбар бүхэлдээ “Иргэдэд ойр эрх зүйн үйлчилгээний жил” болгох зорилтыг дэвшүүлж байна. Энэ хүрээнд иргэдийн эрх зүйн боловсролыг дээшлүүлэх ажлыг шинээр зохион байгуулж, гэмт хэрэг эрх зүйн зөрчлөөс урьдчилан сэргийлэх ажлын үр нөлөөг дээшлүүлэхэд анхаарч, орон нутгийн байгууллагуудтай хамтын ажиллагаагаа дээшлүүлж, эдийн засаг, бизнесийн орчинд үзүүлэх хууль зүйн албаны үйлчилгээг чанарын шинэ шатанд гаргахаар зорьж байна. Хууль зүй, дотоод хэргийн салбарын байгууллагуудын үйл ажиллагаа иргэдэд улам бүр ойртож, онлайн болон орчин цагийн мэдээллийн технологийн үйлчилгээний дэвшилтэт хэлбэрүүдийг ашиглах замаар иргэд, байгууллагад үзүүлэх үйлчилгээг хөнгөн шуурхай, хялбар болгох, архив, бүртгэл, оюуны өмч, гадаадын иргэн харьяатын асуудал эрхэлсэн байгууллагуудын мэдээллийн санг илүү нээлттэй болгох зэргээр эрх зүйн үйлчилгээг шинэ түвшинд гаргах шаардлагатай байгаа гэж ХЗДХ-ийн сайд С.Бямбацогт энэ үеэр онцлов.