МУБИС-д "Орос хэлний сургалтын төв" байгуулна

МУБИС-ийн урилгаар БСШУС-ын сайд Ж.Батсуурь хүрэлцэн ирж багш, ажилтан, албан хаагчид, оюутан суралцагчдын төлөөлөлтэй уулзан ярилцаж, тэдний сонирхсон асуултад хариулав.

БСШУС-ын сайд Ж.Батсуурь багш нар, оюутнуудтай хийсэн уулзалтынхаа үеэр "Орос хэлний сургалтын төв"-ийг ОХУ-ын М.В.Ломоносовын нэрэмжит Москвагийн их сургуулийн дэмжлэгтэйгээр МУБИС-д байгуулахаар болсноо мэдэгдэв. Тус төв нь орос хэлний багш нарын мэргэжлийг дээшлүүлэх, Орос хэлний бэлтгэл ангийг нээн хичээлүүлэх, манай оронд ОХУ-ын сургалтын хөтөлбөрөөр хичээллэдэг хоёр улсын хамтарсан ЕБС төгсөгчдийн төгсөлтийн шалгалт авах боломжийг бүрдүүлэх юм.
БСШУС-ын сайд Ж.Батсуурийг БСШУСЯ-ны Бодлогын хэрэгжилтийг зохицуулах газрын дарга М.Мөнхбаатар дагалдан явсан бөгөөд тэдэнд МУБИС-ийн захирал Д.Мөнхжаргал, Дэд захирал Л.Ганцэцэг, Х.Тамир нар МУБИС-ийн сургалтын өнөөгийн байдал, сүүлийн үеийн бүтээн байгуулалт, эрдэмтэн багш оюутнуудын шилдэг бүтээлүүдээс танилцуулав.
Уулзалтын дараа шинээр томилогдсон боловсролын сайддаа болон БСШУСЯ-ны Бодлогын хэрэгжилтийг зохицуулах газрын даргаар томилогдоод байгаа МУБИС-ийн Биологийн тэнхмийн эрхлэгч доктор, дэд профессор М.Мөнхбаатар нарт МУБИС-ийн захирал Д.Мөнхжаргал оюутнуудынхаа урласан бүтээлийн дээжээс дурсгал болгон өгч ажлын амжилт хүссэн юм.