Үндсэн хууль батлагдсаны 25 жилийн ой маргааш тохионо

А.Алтжин

Монгол Улсад Ардчилсан шинэ үндсэн хууль батлагдсаны 25 жилийн ой маргааш тохионо. Аливаа улс орон Ардчилсан үндсэн хуультай болсноор улс орны эдийн засаг тэлж, хүний эрх, эрх чөлөөг дэлхий дахинаа тунхаглах орчин нөхцөл бүрддэгийг түүхчид ярьдаг.

Иймд түүхэндээ дөрвөн удаа хуулиа шинэчилсэн манай улсын хувьд 1992 оны шинэ үндсэн хуулийг нийгмийн анги давхраа, үзэл бодлоор ялгаварлахгүй, нийтлэг ашиг сонирхлыг нь хамгаалсан ардчилсан хууль болсон гэж дүгнэдэг.

Энэхүү Ардчилсан үндсэн хуулийг батлахад оролцсон 430 депутатын ес нь эмэгтэй төлөөлөгч байсан гэдэг. Тодруулбал тав нь их эмч, хоёр нь сэтгүүлч, үлдсэн хоёр нь малчин, нийтийн хоолны мэргэжилтэн байжээ. Хэдийгээр цөөхөн бүсгүй хүн байсан ч үндсэн хуулийн өөрчлөлтөд эмэгтэйчүүдийн дуу хоолой, үзэл санааг тусгахад тэдний үүрэг оролцоо өндөр байжээ.